ဆက်အောင်နိုင်ကို လွမ်းလို့ရေးတဲ့ကဗျာ

အိမ်ဦးခန်းမှာတင်ထားတဲ့

Red Label ပုလင်းကို ငေးကြည့်နေမိတယ်

ဘာဖြစ်လို့လည်းဆိုတော့

ကိုဆက် ကို သတိရမိနေလို့ပါ။

Red Label ပုလင်းကိုကြည့်ပြီး

ကိုဆက် ကို သတိရနေတယ်ဆိုတာက

အချက် ၂ ချက်ကြောင့်ဖြစ်တယ်။

တွဲမိသမျှ ကာလတလျောက်လုံး

ဈေးအပေါဆုံး တောအရက်ကြမ်းကြမ်းကြီးတွေကို

ပစ္စည်းမဲ့ပီသစွာ

(နယ်စပ်မှာ နိုင်ငံရေးလုပ်နေကြပြီး

ငွေဆိုလို မယ်မယ်ရရ မကပ်ခဲ့ကြသူတွေမို့

ပစ္စည်းမဲ့ဆိုသည့် စကားလုံးကို သုံးခြင်းဖြစ် - ဤကား စကားချပ်)

အရူးအမူးသောက်ခဲ့ကြသူချင်း

အရက်ကောင်းလေးသောက်မိတဲ့အခါ

(ဆိုလိုတာက)

ဖတ်ညွန်းဆရာတွေ ပြောလေ့ရှိသလိုမျိုး

အစားကောင်းလေးစားမိတဲ့အခါ မိတ်ဆွေတွေကို သတိရတယ်ဆိုသလိုမျိုး

သောက်ညွှန်းလေးနဲ့ သတိရမိတာက တခု …..။

သူက

ကိုဆက် က

ပြောလေ့ရှိတာက

ဟေ့လူ နီစရာရှိ ရဲရဲနီ

            သတ္တိရှိရင် နငယ်နဲ့နီ

            ဘယ်သူ့ကိုမှ ဂရုမစိုက်စတမ်းနီ

အဲဒီလိုနဲ့ အမေရီကားရောက်တော့

အရက်ပြန်သောက်ဖို့ ဆုံးဖြတ်လိုက်တော့

ဟေ့လူ ကိုဆက်

ကျုပ်က နီ စရာရှိ

Red Label သောက်ပြီးနီတယ်ဗျာ ဆိုပြီး

သောက်တဲ့ အရက်ဖြစ်လို့ သတိရတာက တခု …။

တကယ်တော့

ကြီးကျယ်ခမ်းနားခဲ့သူပါ

နိုင်ငံရေးတွင်းစားရိုး

ဆက်အောင်နိုင်ဆိုတာ

မြင့်မိုရ်ထက်မြင့်သောနေရာ

အားထားရတဲ့ အရေးတော်ပုံတပ်သား

တိုက်ရိုက်ထိတွေ့ခွင့်ရ ရဲဘော်

အဖွဲ့အစည်းအသီးသီးရဲ့ လိုလားခြင်းခံရသူ

အဲဒီလိုလူ

သူဟာ

ကြက်ဥအရောင် တိမ်တောင်သဖွယ် မင်းရေးကျယ်

နိုင်ငံရေး အနိမ့် - အမြင့်

            အတက် - အကျ

ဖြတ်သွား ဖြတ်လာတွေကြားမှာ

နိမ့်ရာစိုက်တဲ့ လှံတံတွေများစွာ

သူ့အဖေကြောင့် သူ့ကို ဆက်ဆံခဲ့ကြတာ ဆိုပဲ။

တခါတခါ

သူက တွေးတွေးဆဆ ပြောလေ့ရှိတယ်

ကျုပ်တို့က အနုပညာသမားတွေဗျ

ခံစားမှုက တွန်းပို့လိုက်ရင်

ဆင်ဆင်ခြင်ခြင် လုပ်နိုင်စွမ်းတွေ ပျောက်သွားလေ့ရှိတယ်။

သီချင်းရေးဆရာ

ဗုံတီးသမား

ထောင်တွင်းတိုက်ပွဲတွေမှာ

မိုက်မိုက်ကန်းကန်း ပြတ်သားခဲ့သူ

လူငယ်ထုရဲ့ ချစ်ခင်မှုကို ခံရသူ

ရဲဘော်နဲ့ သေနတ်ကြား

ရင်ကော့ကြားဝင်ပြီး ရဲဘော်ရဲဘတ်စိတ်ကိုပြခဲ့သူ

ရဲဘော်ချင်းအချစ်မှာ

အိပ်သွန်ဖာမှောက်အကုန်အစင်စိတ်ဓါတ်ရှိသူ

သူ့နိုင်ငံရေးကို သူဘာသာ အရက်နဲ့မြည်းပြသွားခဲ့သူ။

မိုးကြိုမုန်တိုင်းတွေ ရွာလိုအားကောင်းနေတဲ့ကာလ

ဒုက္ခသည်စခန်း တောင်ခါးပန်းက တဲကလေးမှာ အတူနေခဲ့ကြတယ်

ကျနော်က ကျနော့်ကိုယ်ကျနော် တော်လှန်ရေးငယ်ဖြူတပါးအဖြစ် တင်စားလေ့ရှိပြီး

သူကတော့ ကျနော့်ကို ကဗျာဆရာ - သိုင်းသမား လို့ ရည်ညွှန်းလေ့ရှိတယ်

တနေ့တော့ ကျနော်က ပြောတယ်

သိုင်းပညာ အဖျက်အစီးခံလိုက်ရတဲ့ သိုင်းသမားတွေလိုမျိုး … ဆိုတော့

သူကဖြည့်စွပ်ပြီးပြောတယ်

သိုင်းပညာကို ဖျက်စီးတဲ့နေရာမှာ ၃ မျိုးရှိတယ်ဗျ

-       အဆိပ်မိသွားလို့ သိုင်းပညာပျက်စီးသွားတာရယ်

-       အတွင်းအား ဆုံးရှုံးအောင်လုပ်ပြီး သိုင်းပညာဖျက်စီးတာရယ်

-       သိုင်းကွက်တွေကို ရှုပ်ထွေးစေပြီး သိုင်းကွက်ဖော်လို့မရအောင် ဖျက်စီးလိုက်တာရယ်။

သိုင်းလောကရဲ့ တိုက်ပွဲတွေထဲမှာ

လက်နက်ပုန်းတွေ

ချောင်းမြောင်းတိုက်ခိုက်မှုတွေကြောင့်

အတွင်းဒါဏ်ရာ ရရှိသွားပြီး သိုင်းပညာအဖျက်စီးခံရသူအတွက်

သိုင်းပညာပြန်ယူတဲ့ကိစ္စမှာ

အတွင်းအား ဟာ အရေးကြီးတယ်ဆိုတာ သိလာခဲ့တယ်။

အဲဒီလိုနဲ့

ဒီကဗျာကိုရေးဖြစ်တယ်

တကယ်တော့ ဒီကဗျာဟာ

ဆက်အောင်နိုင်ကို လွမ်းလို့ရေးတဲ့ကဗျာဖြစ်သလို

ကျနော့်အတွင်းအား

ဘယ်မျှ ဖွံ့ထွားလာပြီးလည်းဆိုတာကိုလည်း စမ်းကြည့်တဲ့ကဗျာဖြစ်တယ်။

၂၃ - ၆ - ၂၀၁၄

ညိုထက် (လမ်းသစ်ဦး)