ဒီကနေ့ အရက်ဆာတယ်
အဲဒါနဲ့ အရက် သွားဝယ်လိုက်တယ်။
ပြန်စဉ်းစားတော့
ကယန်းပြည်သစ်ပါတီရဲ့
ပြည်ရန်အေးစခန်းကို သတိရမိသွားတယ်။
အဲဒီမှာ အရက်စသောက်တယ်
အဲဒီလိုနဲ့ ကလေးသူပုန်လေးဟာ လူကြီးဖြစ်လာတယ်။
ရွှေ့ပြောင်းတောင်ယာ
တော်လှန်စစ်သည်
ကစမ်းနဲ့ ကာကီပေါင်းစပ်
ပေါင်းလောင်းချပ်မြှုပ်ရာအရပ်မှာ အရက် သောက်ခဲ့တယ်။
ပြည်သူ့အကျိုးဆောင်ကြ ဆိုတဲ့ ဆောင်ပုဒ်ကို
ရင်ဘတ်မှာ ချိပ်လို့ အရက် သောက်တယ်
လူထုကိုမှိခိုကာ တော်လှန်စစ်နွဲရမှာ ဆိုတဲ့
တေးချင်းကိုသိလို့ အရက် သောက်တယ်
မောင်းပြန်ကို ဒေါင်းအလံနဲ့ တိုက်မယ် ဆိုတဲ့
စိတ်ဓာတ်နဲ့ အရက် သောက်တယ်
ငယ်ရွယ်နုပျိုမှုတွေ အတိုက်အစားခံပြီး အရက်
သောက်တယ်
ဒီမိုကရေစီတော်လှန်ရေး ပေါင်းစည်းပေးမည်
တပ်ပေါင်းစုနဲ့ အောင်ပွဲခံရေး
အဲဒီ ယုံကြည်စိတ်နဲ့ အရက် သောက်တယ်။
သူပုန်တွင်းနက်နက် အချစ်တွေနဲ့
တယောက်ကို တယောက် အရက်တွေ ငှဲ့လို့
သံသာလေ ကမ်းတိုင်
တူပြိုင်ကာ သောက်ကြတယ်။
ဆီးပူးဆိုတဲ့ ရွာလေးမှာ သောက်တယ်
နောင်ထော်မှာ သောက်တယ်
တောင်ယာတွေမှာ သောက်တယ်
သူပုန်စခန်းတွေမှာ သောက်တယ်
ဒုက္ခသည်စခန်းတွေမှာ သောက်တယ်
ဖိုးထွန်းကျော်ရဲ့ တဲကလေးမှာ သောက်တယ်
ထုံထောင်းမှာ သောက်တယ်
ကျောက်ခုံမှာ သောက်တယ်
၄၈ မှာ သောက်တယ်
အမေရိကားမှာ သောက်တယ်
အရက် သောက်ကြတယ်။
ပါဏာတိပါတ ကံတွေကို လက်ညှိုးနဲ့ ကုတ် ညှစ်ထုတ်ခဲ့သူပါ
ဓါး ဓါး ချင်း
လှံ လှံ ချင်း စိတ်ဓာတ်ကို
လက်မောင်းမှာ ကပ်ပြီး ကြီးခဲ့ရသူပါ
ပြုစု ပျိုးထောင်လာခဲ့ရတဲ့ ဘ၀
ကြီးပေါင်းထ
လှပတဲ့ သူပုန်ယဉ်ကျေးမှု
ဦးညွတ်။
တော်လှန်ကျောင်းသား ဘ၀များ အလီလီ
ငါတက်ခဲ့တဲ့ တောင်တွေကို ပြန်လှည့်ကြည့်လိုက်တော့
မာန ကြီးကြီးမြင့်သွားတယ် ဆိုသလိုမျိုး
…..။
ကရင်နီ အရက် သောက်တယ်
ကောက်ညှင်း အရက် သောက်တယ်
ဆန် အရက် သောက်တယ်
သကြား အရက်သောက်တယ်
ဇ၀က်သာ အရက် သောက်တယ်
လောက်ခေါင်ကို အချိုရည်ရောပြီး သောက်တယ်
မိုက်ခေါင် အရက် သောက်တယ်
ပုလွေဆရာ တရာ အရက် သောက်တယ်
ရေဂျင်စီ အရက် သောက်တယ်
…. သောက်တယ်
…. သောက်တယ်
ငါအခု သောက်နေတာ
Red Label
အရက် ဖြစ်တယ်။
ညိုထက် (လမ်းသစ်ဦး)
၂၈ - ၂ - ၂၀၁၄
No comments:
Post a Comment