Wednesday, May 27, 2015

ဝိရောဓိအချစ်

သင်္ကြန်မှာ
ရေမစိုတဲ့အခါ
လွမ်းရတာတွေနဲ့ ထောင်းထောင်းကြေ။

ရေမစိုတဲ့သင်္ကြန်တွေနဲ့ စီးချင်းထိုးခဲ့ဖူးတယ်
စစ်မြေပြင်ကျေးလက်မှာ။

“ရှားပါးပွင့်ပေါက်
တောပိတောက်ကို
ဘားတိုက်ဆောက်ဖို့ခုတ်လိုက်ပြီ။” လို့လည်း
တို့မှတ်ခဲ့ဖူးတယ်
စစ်တန်းလျားကျေးလက်မှာ။

တူးပို့တေးသံနဲ့
ရေတွေ … ရေတွေ စိုကုန်ပြီဆိုတဲ့ သင်္ကြန်မှာပေါ့
ပုတက်စာတွေ လိုက်ချိုးကြ
ဥသျှစ်ရွက်တွေ လိုက်ဆွတ်ကြ
ခါချဉ်ဥတွေ လိုက်ဖွတ်ကြ
မြင်းခွာရွက်တွေ လိုက်နှုတ်ကြ
ပုရစ်တွေ လိုက်တူးကြ
ပုဇင်းရင်ကွဲတွေ လိုက်ဖမ်းကြ။

နွေခေါင်ခေါင်
ရေခေါင်ခေါင်မှာ
ရန်နဲ့ငါ
ကျဉ်ဆန်တွေ လောင်းချကြဖို့
တောင်တန်းတွေပေါ်မှာ
မဏ္ဍပ်ထိုးပြီး စောင့်ခဲ့ကြဖူးတယ်။

ရေမစိုတဲ့သင်္ကြန်
သံလွင်
သောင်ရင်း
သောက်ရေခပ်
ပွန်ချောင်း
ပေါင်းလောင်းချောင်းတွေထဲ
ခုန်ခုန်ချကြ
အဲဒီလိုနဲ့ ကျေနပ်ခဲ့ကြရ။

လူထုကိုမှီခိုက
တော်လှန်စစ်နွှဲရမှာ။

သင်္ကြန်မှာရေမစိုစဉ်က
တခုခုကိုလွမ်းခဲ့ပြီး
အခုတော့
ရေမစိုတဲ့သင်္ကြန်တွေကိုပဲ
ပြန်ပြန်လွမ်းနေရ
တောင်ယာကျေးလက်က ရေမကစားတက်ဖူးလေ။

သားရေ …
မင်းရဲ့ ရေသေနတ်လေးနဲ့
မပစ်လိုက်ပါနဲ့
အဖေ့တကိုယ်လုံး
အလွမ်းတွေ ရွှဲရွှဲစိုကုန်မှာစိုး။


ညိုထက် (လမ်းသစ်ဦး)

No comments: